Shtëpitë e shëndetit në të gjithë Serbinë nga sot kalojnë në punë me tri turne, ndërsa qëllimi i vendosjes së orarit 24-orësh është që, sipas Ministrisë së Shëndetësisë, të rritet aksesueshmëria e qytetarëve në kujdesin shëndetësor dhe të sigurohet funksionim më efikas i sistemit shëndetësor.
Siç është publikuar në faqen zyrtare të Ministrisë së Shëndetësisë, zgjatja e orarit të punës së shtëpive të shëndetit dhe qendrave shëndetësore u mundëson qytetarëve të marrin ndihmën bazë mjekësore në çdo moment të ditës dhe të natës, pa pasur nevojë t’u drejtohen qendrave të urgjencës për gjendje që nuk janë emergjente.
Sipas drejtoreshës së Shtëpisë së Shëndetit në Bujanoc, Dalliborka Pavlloviq, pas një takimi në Ministrinë e Shëndetësisë në Beograd, është konfirmuar se Shtëpia e Shëndetit në Bujanoc nuk do të ketë turn të natës.
Arsyeja është se në këtë institucion funksionon shërbimi i Ndihmës së Shpejtë, dhe në bazë të diskutimeve të zhvilluara në ministri është vendosur që shtëpitë e shëndetit, në të cilat shërbimi i Ndihmës së Shpejtë është aktiv, të mos kalojnë në orar 24-orësh.
