Përfaqësuesit institucional dhe politik të komunës së Bujanocit sot pas një takimi të përbashkët janë dakorduar që ti drejtohen institucioneve relevante ndërkombëtare duke ia adresuar shqetësimet e popullatës shqiptare dhe mos gatishmërinë e Beogradit zyrtar për të mos zgjidhë problemet.
Lajmin përmes rrjetit social e ka bërë të ditur zv. Kryetari i komunës së Bujanocit Shqiprim Musliu.
Postimi i plotë:
Bashkë me përfaqësuesit politik e institucional të Komunës së Bujanocit, OVL-në e UÇPMB-së, Deputetin popullor si dhe Këshillin Kombëtar Shqiptar, sot njëzëri i adresuam problemet politike e kombëtare të shqiptarëve të Luginës së Preshevës.
Nëpërmjet një përshkrimi të shkurt e të qartë, ju drejtuam z.Josep Borell, z.Miroslav Lajčak si dhe znj.Ursula Von Der Leyen, si përfaqësues e udhëheqës të Bashkimit Europian.
I njoftuam institucionet përkatëse mbi problemet e vazhdueshme që po përballen shqiptarët, që nga paslufta e këndej, duke i njoftuar mbi mos gatishmërinë e Beogradit zyrtar për të mos zgjidhë problemet, por vetëm për t`i shtuar ato.
Të drejtat kombëtare, gjuha e urrejtjes, albanofobia, e deri tek rasti më i fundit i provokimit në lapidarin e dëshmorit Fatmir Ibishit, janë disa nga çështjet e ndjeshme me të cilat BE-ja duhet ta ketë një vëmendje të veçantë dhe t`i monitorojë nga afër situatën që po bëhet në vazhdimësi nga Beogradi zyrtar.
Uroj që ky mesazh të jetë një reflektim mbi të gjithë akterët politik rajonal e ndërkombëtar, që provokime të tilla të mos përsëriten, e problemet e pazgjidhura të zgjidhen.
