Ministri për të Drejtat e Njeriut dhe të Pakicave dhe Dialogun Social, Demo Berisha, deklaroi sot se të gjitha çështjet që lidhen me pakicën kombëtare shqiptare në Serbi mund të zgjidhen vetëm brenda institucioneve të shtetit ku ata jetojnë.
Para takimit me përfaqësuesit e Këshillave Kombëtare të Pakicave në Pallatin e Serbisë, Berisha theksoi se problemet e komunitetit shqiptar nuk mund të adresohen jashtë vendit.
“Të gjitha çështjet që kanë të bëjnë me komunitetin kombëtar të pakicës shqiptare mund të zgjidhen vetëm në Beograd. Ato nuk mund të zgjidhen askund tjetër – as në Prishtinë, as në Tiranë, as në Uashington – por në vendin ku jetojnë”, u shpreh ai.
I pyetur nëse delegacioni i pakicës shqiptare nga Bujanoci kishte marrë pjesë në takim dhe nëse kjo do të ndikonte në qëndrimin e tij, ministri tha se ata nuk kishin ardhur, por se ftesa mbetet e hapur.
“Ftesa është ende e hapur për ta dhe ne do të vazhdojmë të presim vendimin e tyre”, deklaroi Berisha, duke shtuar se qëndrimi i tij mbetet i pandryshuar që nga marrja e detyrës në prill të vitit të kaluar.
Ai theksoi se është i hapur për bashkëpunim me të gjitha këshillat kombëtare, jo vetëm me Këshillin Kombëtar të komunitetit të cilit i përket vetë, por me të gjitha pakicat në Serbi.
Sipas tij, pakicat kombëtare përbëjnë 12.3 për qind të popullsisë së përgjithshme të Serbisë, ose mbi 801 mijë banorë, çka, siç tha, tregon rëndësinë e dialogut institucional dhe zgjidhjes së çështjeve në kuadër të sistemit shtetëror.
