Nxënësit që vijojnë mësimin në gjuhën shqipe me vite në Bujanoc, Preshevë dhe Medvegjë nuk i kanë të gjitha tekstet në gjuhën amtare. Ministria e Arsimit ka miratuar edhe 19 tekste të tjera, në mënyrë që nxënësit e shkollave fillore të kenë shumicën e librave të nevojshëm.
Për momentin mungojnë librat nga historia, gjeografia, biologjia, muzika dhe arti figurativ për mësimin në gjuhën shqipe në shkollat fillore në Bujanoc dhe Preshevë. Ata mësojnë nga shënimet dhe tekstet që mësuesit përgatisin për ta.
“Na është e vështirë, dëgjojmë orët e mësimit dhe shkruajmë dhe çdo gjë e shkruajmë, sepse nuk kemi libra”, thotë Aljine Sulejmani, nxënëse, përcjell LajmiAL.
“Sapo t’i marrim librat do të jetë më e lehtë për ne, do të mësojmë më lehtë dhe do t’i kuptojmë mësimet më mirë, do të mësojmë më mirë”, thotë Nazlije Selimi, nxënëse.
“Librat i kam përkthyer kështu për mua dhe duhet t’i bëj sërish gati për nxënësit. Megjithatë, është e vështirë për një nxënës të arrijë atë që dëshiron,” tha Ramadan Nivzadi, mësues i biologjisë në shkollën fillore Naim Frashëri në Tërnocin e madh.
Nxënësit e shkollave të mesme gjithashtu arrijnë të kopjojnë materiale të përgatitura nga profesorët nga tekstet e miratuara në gjuhën serbe përmes internetit.
“Unë e konsideroj veten se kam një nivel të njohurive të gjuhës serbe, kështu që më krijon probleme shtesë dhe mund ta imagjinoni që shumë kolegë të mi nuk janë në një nivel të lakmueshëm që të mund të përkthejnë materiale për studentët”, tha Bujar Mustafa, profesor i shkollës së mesme Sezai Suroj në Bujanoc.
“Kemi profesorë që na lejojnë të shkruajmë në fletore dhe të studiojmë në shtëpi prej andej, e kemi të vështirë”, thotë Ejona Pajaziti, nxënëse.
Ministria e Arsimit deri më tani ka miratuar 25 tekste, ndërsa tani edhe 19. Në Bujanoc, Preshevë dhe Medvegjë mësimin në gjuhën shqipe e ndjekin rreth tetë mijë nxënës./LajmiAL/
