Dr. Sc. Rabit Veseli emërohet drejtor i shkollës fillore “Sami Frashëri” në Lluçan komuna e Bujanocit – një rikthim i përvojës dhe vizionit në drejtimin e arsimit
Ministria e Arsimit e Republikës së Serbisë ka marrë vendimin zyrtar për emërimin e Dr. Sc. Rabit Veselit në postin e drejtorit të shkollës fillore “Sami Frashëri” në Lluçan të komunës së Bujanocit. Ky mandat katërvjeçar vjen pas një procesi institucional dhe konsultimesh të gjera brenda strukturave arsimore.
Procedura për emërimin e Veselit kaloi nëpër disa etapa të rëndësishme. Fillimisht, në dhjetor të vitit 2025, ai mori mbështetjen e shumicës së anëtarëve të Këshillit të Arsimtarëve të shkollës. Po ashtu, mbështetje të gjerë ai mori edhe nga Këshilli i Shkollës, duke konfirmuar besimin e stafit dhe strukturave drejtuese të institucionit.
Procesi vijoi me marrjen e mendimit pozitiv edhe nga Këshilli Kombëtar Shqiptar, institucion ky që përfaqëson interesat arsimore dhe kulturore të shqiptarëve në Luginën e Preshevës. Pas përfundimit të të gjitha procedurave, më 12 mars Ministria e Arsimit dha vendimin përfundimtar duke e emëruar Rabit Veselin drejtor të shkollës.
Me rastin e këtij emërimi, Veseli ka shprehur mirënjohjen për të gjithë ata që e mbështetën gjatë procesit dhe theksoi se do ta ushtrojë këtë detyrë me përkushtim dhe përgjegjësi, duke u angazhuar për zhvillimin e mëtejshëm të shkollës dhe përmirësimin e cilësisë së arsimit.
Një jetë e lidhur me arsimin dhe sportin
Dr. Sc. Rabit Veseli ka lindur më 12 maj 1963 në fshatin Lluçan të komunës së Bujanocit. Arsimin fillor e përfundoi pikërisht në shkollën ku sot rikthehet në rolin e drejtuesit – shkollën “Sami Frashëri” në vendlindjen e tij. Më pas, shkollimin e mesëm e kreu në gjimnazin “Sezai Surroi” në qytetin e Bujanocit.
Studimet universitare i përfundoi në Universiteti i Prishtinës, në Fakultetin e Kulturës Fizike dhe Sportit gjatë viteve 1986–1990, duke fituar titullin profesor i Kulturës Fizike dhe Sportit. Karrierën profesionale e filloi në vendlindje, ku nga viti 1990 deri në vitin 1999 punoi si mësimdhënës në shkollën fillore “Sami Frashëri”.
Në periudhën 1999–2003 ai vazhdoi punën në shkollën e mesme teknike Shkolla e Mesme Teknike “Hasan Tahsini” Kastriot në Kosovë, duke zgjeruar përvojën e tij pedagogjike.
Në vitin 2008 ai përfundoi studimet pasuniversitare në Fakultetin e Kulturës Fizike duke fituar gradën Magjistër i Kulturës Fizike dhe Sportit, ndërsa më 14 nëntor 2016 në Universitetin e Tetovës mori titullin Doktor i Kineziologjisë, duke e përforcuar më tej profilin e tij akademik dhe profesional.
Përvojë e dëshmuar në drejtimin e shkollës
Rabit Veseli nuk është një emër i ri në drejtimin e kësaj shkolle. Nga tetori i vitit 2003 deri në maj të vitit 2012 ai shërbeu si drejtor i shkollës fillore “Sami Frashëri”, periudhë gjatë së cilës institucioni përjetoi zhvillime të rëndësishme në organizimin dhe aktivitetet arsimore.
Përveç angazhimit në arsimin parauniversitar, Veseli ka kontribuar edhe në arsimin e lartë. Gjatë viteve 2017–2021 ai ligjëroi në Kolegjin “Universi” lëndët Zhvillimi Motorik dhe Pingpongu, ndërsa në Fakultetin e Kulturës Fizike dhe Sportit të Universiteti i Prishtinës ligjëroi lëndën Sociologjia e Edukimit Fizik dhe Sportit.
Një mandat me pritje të mëdha
Rikthimi i tij në krye të shkollës “Sami Frashëri” konsiderohet nga shumë arsimtarë dhe prindër si një mundësi për vazhdimin e zhvillimit të arsimit në këtë institucion me traditë në Lluçan. Përvoja e gjatë në arsim, përgatitja akademike dhe njohja e mirë e realitetit lokal pritet të jenë elemente kyçe në drejtimin e shkollës gjatë katër viteve të ardhshme.
Emërimi i Dr. Sc. Rabit Veselit përfaqëson jo vetëm një rikthim të përvojës në drejtimin e shkollës, por edhe një sinjal për vazhdimësinë e përkushtimit ndaj arsimit dhe zhvillimit të gjeneratave të reja në komunën e Bujanocit./LajmiAL/
