Familjet që u lindin fëmijë këtë vit do të kenë të drejtën e subvencionimit deri në 20 mijë euro nëse vendosin të blejnë një apartament ose të ndërtojnë një shtëpi brenda një viti nga lindja e fëmijës.
Në kuadër të politikës së nxitjes së natalitetit, qytetarët që vendosin të ndërtojnë një shtëpi në komunat e pazhvilluara mund të marrin një subvencion deri në 50 për qind të vlerës së punimeve, ndërsa për ndërtimet në vetqeverisjet tjera vendore mund të llogarisin në maksimum 20 për qind.
Në rastin e blerjes së një apartamenti apo shtëpie, shteti do të ndihmojë prindërit e freskët deri në 20 për qind të vlerës së kontratës së shitjes dhe maksimumi 20 mijë euro. Nëse pasuria e paluajtshme blihet me kredi, shteti ndihmon duke marrë sërish pjesë deri në 20 për qind të vlerës së shënuar në marrëveshjen e shitblerjes, shkruan danas, transmeton LajmiAL
Sipas ministrit të Financave, Sinisha Mali, synimi është që sa më shumë qytetarë ta ushtrojnë këtë të drejtë, për të nxitur natalitetin në vend.
Padyshim që duket si një qëllim i mirë, por pasojat nuk duhet të jenë gjithmonë të njëjta.
Konkretisht, ekspertët paralajmërojnë se kjo masë mund të ndikojë në tregun tashmë të mbinxehur të pasurive të paluajtshme, si vaji në zjarr.
Në dy vitet e kaluara, përkundër pandemisë, mbylljes dhe problemeve me ekonominë në nivel global, çmimet e banesave në Serbi, sipas ekspertëve, janë rritur nga 20 deri në 30 për qind. Për këtë janë pjesërisht përgjegjëse paketat e ndihmës shtetërore, si dhe zgjerimi i kredisë.
Dejan Shoshkiç, profesor në Fakultetin Ekonomik në Beograd dhe ish-guvernator i Bankës Kombëtare të Serbisë, beson se çmimet e pasurive të paluajtshme në vendin tonë janë shumë të larta në krahasim me qytete të ngjashme në rajon dhe një masë e tillë do të ndikonte në rritjen e tyre shtesë.
“Ashtu si masat e tjera të tilla si subvencionimi i interesave për kredinë për banesa, ato kontribuojnë në rritjen e çmimeve, në mënyrë që ky subvencion të derdhet tek shitësit e apartamenteve. Ata gjithmonë kalojnë më së miri me masa të tilla shtetërore. Nëse situata është më e lehtë për disa familje, sigurisht që është mirë, por mendoj se është dashur të bëhet një debat publik për të parë se sa persona do të aplikojnë, sa para nevojiten”, thekson Shoshkiç.
